મહાભારત કાળ સાથે છે શીતળામાતાના આ મંદિરનો નાતો, ગુરૂ દ્રોણના પત્ની....

દેશ-દુનિયામાં દેવી-દેવતાઓના અનેક અનોખા મંદિરો(mandir) આવેલા છે. શીતળામાતા(Shitlamata)ની પૂજા-અર્ચના પણ ભારતીય સંસ્કૃતિમાં પ્રચલિત છે. ત્યારે આવો, આજે અમે આપને શીતળા માતાના એક એવાં સ્થાનકનો મહિમા જણાવીએ કે જે મહાભારતકાલિન(mahabharat) મનાય છે. અને અહીં મારવાડી સાતમ-આઠમ પર દર્શનનો સવિશેષ મહિમા રહેલો છે.

શીતળા માતાનું અનોખું મંદિર

સમગ્ર ભારતમાં માતા શીતળાના તો અનેક મંદિર આવેલા છે. પરંતુ, હરિયાણા(Haryana)ના ગુરુગ્રામ(Gurugram)માં સ્થિતિ માતા શીતળાનું મંદિર અત્યંત ખાસ મનાય છે. એક માન્યતા અનુસાર તેનો નાતો તો મહાભારત(Mahabharat) કાળ સાથે જોડાયેલો છે. અને એટલે જ શ્રદ્ધાળુઓને મન અહીં દર્શનનો સવિશેષ મહિમા રહેલો છે. અહીં ભવ્ય મંદિર મધ્યે માતા શીતળાની મનોહારી પ્રતિમા પ્રસ્થાપિત કરવામાં આવી છે. જેના દર્શન કરી શ્રદ્ધાળુઓ ધન્યતાની અનુભૂતિ કરે છે.

મનોકામનાઓ થાય છે પૂર્ણ

ગુરુગ્રામમાં બિરાજમાન દેવી શીતળાની ઘણાં ભાવિકો કુળદેવી રૂપે પૂજા કરે છે. અહીં દેવીને જળ અર્પણ કરીને માનતા માનવાની પ્રથા છે. એક માન્યતા અનુસાર દેવી દરેક પ્રકારના કષ્ટમાંથી લોકોને છોડાવે છે. તો જેમને શેર માટીની ખોટ છે, તે શ્રદ્ધાળુઓ ખાસ અહીં માતાના દર્શને આવે છે. કહે છે કે મા સૌની ખાલી ઝોળીને ખુશીઓથી ભરી દે છે ! એ જ કારણ છે કે દર વર્ષે શીતલા સપ્તમી અને શીતલા અષ્ટમી પર અહીં ભક્તોની ભારે ભીડ ઉમટે છે.

મહાભારત કાળ સાથે જોડાયેલ લોકવાયકા

આ સ્થાનક સાથે જોડાયેલી પૌરાણિક કથા અનુસાર ગુરુગ્રામ એ વાસ્તવમાં મહાભારતના ગુરુ દ્રોણની(Guru Dron) નગરી હતી. કૃપાચાર્ય(Kripacharya)ની બહેન અને મહર્ષિ શરદ્વાનની પુત્રી કૃપીના ગુરુ દ્રોણ સાથે લગ્ન થયા હતા. મહાભારતના યુદ્ધ(Mahabharat war)માં જ્યારે ગુરુ દ્રોણ વીરગતિને પામ્યા ત્યારે તેમની પત્ની કૃપી તેમની સાથે જ સતી થઇ ગયા. સતી થતી વખતે દેવી કૃપીએ લોકોને આશીર્વાદ આપ્યા કે આ સ્થાન પર જે લોકો કોઈપણ મનોકામના લઈને આવશે, તેની ઇચ્છા તે પૂરી કરશે. વાસ્તવમાં દેવી કૃપી જ અહીં શીતળા માતાના નામે પૂજાય છે. જેમના દર્શનાર્થે લાખોની સંખ્યામાં શ્રદ્ધાળુઓ દર વર્ષે અહીં ઉમટતા રહે છે.